జనవరి 1, 2013

శుభాకాంక్షలు

Posted in Uncategorized at 1:12 సా. by వసుంధర

ప్రపంచం అంతం కానున్నదన్న భ్రమకు ఎందరినో గురిచేసిన 2012ని దాటుకుని 2013లో అడుగెడుతున్నాం. 

అన్ని జాతుల్నీ కలుపుకున్నా అమెరికాలో దొరతనం తెల్లవారిదే. అందుకే వారి రాజభవనం తెల్ల ఇల్లు. 2008లో అ ఇంట ఓ నల్లనివాడికి దొరతనం లభించింది. అమెరికన్ల భావపరిణతి, వైశాల్యం- తాత్కాలికమని కొందరు భావించారు. 2012లో ఒబామాకి మరోసారి దొరతనం లభించడంతో- ఆ మార్పు తాత్కాలికం కాదని తేలిపోయింది. అణగద్రొక్కబడినవారు రిజర్వేషన్లు లేకుండానే అర్హతలతో అందలాలెక్కగలరన్న ఆశాభావానికి ధ్రువతార ఒబామా. ఆయనకు సకల సాఫల్యాన్ని కోరుకుందాం.

నల్లనివాడిలో దైవత్వాన్ని చూస్తుంది భారతం. ఆ భారతంలో నల్ల ధనానికి నాయకత్వం లభించడం సహజమని చాలామంది సరిపెట్టుకుంటున్నారు. కానీ అన్నా హజారే ఒప్పుకోలేదు. పొట్టివాడైనా అవినీతికి వ్యతిరేకంగా గట్టి పోటీయే ఇస్తున్నాడు. ఆయన ప్రభావం తాత్కాలికమేనని కొందరి భావన. కాదని తేల్చనుంది కొత్త వత్సరం.

ఈ ప్రపంచం 2012 డిసెంబర్ 21న అంతం కానున్నదని చాలామందే నమ్మారు. కానీ బడిలో అడుగిడి లేత వయసు చిన్నారుల గుండెల్లో తూటాలు దింపినప్పుడూ, బస్సులో అడుగిడిన చిన్నారికి మానధ్వంసం చేసినప్పుడూ- ఈ ప్రపంచం ఇంకా అంతం కాలేదేమని బాధపడినవారు ఇంకా చాలామంది. ఇటీవల డిల్లీలో నిర్భయకు జరిగిన సామూహిక మానవిధ్వంసం- కని విని ఎరుగనిది. ఆ నేరస్థుల్నికఠినంగా శిక్షించాలన్న ఆవేశం దేశమంతటా చెలరేగుతోంది.  ఈ సందర్భంలో మనమొక విషయం గమనించాలి. మన్ం పీల్చే గాలి పెట్రోలు వాడకంతో కలుషితమై కొందర్ని భయంకర వ్యాధులకు గురిచేస్తోంది. వ్యాధిగ్రస్థులకు చికిత్స చేసినంతమాత్రాన మరికొందరు వ్యాధికి గురయ్యే ప్రమాదం తప్పదు. మీడియా, కుల-మత-జాతి-వర్గ ద్వేషాలు, అంతర్జాలం ద్వారా- నేరప్రవృత్తి కూడా మన సమాజపు గాలిలో కాలుష్యమై చేరింది. అది పీల్చినవారిలో కొందరు ఘోర నేరస్థులౌతున్నారు. ఆ కాలుష్యాన్ని హరించే దిశలో మనం ఎక్కువగా కృషి చేయాల్సి ఉంది. 2013 ఆ దిశపై దృష్టి పెడుతుందని ఆశ.

తెలుగు సాహితీ కథా సుధా వేదికగా అక్షరజాలం- తన వంతు కృషి చెయ్యడానికి మీ అందరి సహాయ సహకారాలనూ అర్థిస్తోంది.

అందరికీ నూతన సంవత్సర శుభాకాంక్షలు!

11 వ్యాఖ్యలు »

  1. sujalaganti said,

    వసు౦ధర ద౦పతులకు ఆ౦గ్ల నూతన స౦వత్సర శుభా కా౦క్షలు. మీరు మీ అక్షరజాల౦ ద్వారా చేస్తున్న సాహితీ సేవ కొనియాడతగినది. మిరు ఇ౦కా ఇలాగే సాహితీ సేవ చెయ్యాలని కోరుకు౦టున్నాను. మీరు పైన పేర్కొన్న మాటలు అక్షర సత్యాలు

    • మీ అభిమానానికి ధన్యవాదాలు.


Leave a Reply

%d bloggers like this: