మే 1, 2018

కణం – ఒక స్పందన

Posted in వెండి తెర ముచ్చట్లు, Uncategorized at 9:03 సా. by వసుంధర

kanam poater

బొమ్మకు లంకె

చిత్ర సమీక్ష

ట్రైలర్

టీనేజి సాన్నిహిత్యంలో తొందరపడ్డం తప్పు కాకపోవచ్చు. కానీ గర్భస్రావం తప్పే కాదు, హత్య కూడా అని హెచ్చరించడం కథాంశం.

పాటలు లేవు. ఫైట్లు లేవు. సందేశత్మకమైనా భయానక చిత్రం. ఐతే భయం వేషధారణనుంచో, రక్తపాతంనుంచో పుట్టదు.

చిదిమితే పాలు కారే ఐదేళ్ల పసిపాప. ఆమెని చూస్తే జాలేస్తుంది, ముచ్చటేస్తుంది, భయమూ వేస్తుంది. ఎంతలా అంటే ఈ చిత్రంలో భయపెట్టేది ఆ పసిపాపే. కళ్లు నీలంగా కావు. గాలిలో తేలదు. వికటాట్టహాసాలు చెయ్యదు. 

జాలిగా చూస్తుంది. తల్లి పక్కన ఉన్నప్పుడు ఆమెను అనుకరిస్తుంది. బొమ్మలతో ఆడుకుంటుంది. తనకిష్టం లేనివారివంక కొంచెం కోపంగా చూసినా అది పసిపిల్ల కోపంలాగే ఉంటుంది. ఐనా సినిమాలో భయపెట్టే మనిషీ, అంశమూ తనే!

తెలుగులో హారర్ పిక్చర్సు ఇలా కూడా తియ్యొచ్చు అంటూ ఓ కొత్త ఒరవడి పెట్టిన కథనం ఈ చిత్రానికి ప్రత్యేకం. ఆ  కథనానికి అమిరిన నేపథ్య సంగీతం, అందాన్నిచ్చిన ఛాయాగ్రహణం శభాష్. గ్లామరుకి ఏ మాత్రం ప్రాధాన్యం లేని ఓ పాత్రని అత్యంత సహజం చేసిన సాయిపల్లవికి జోహార్లు. నటుడిగా కెరియర్‍కి ఏమాత్రం సహకరించని ఓ పాత్రని ఎంచుకుని, దానికి న్యాయం చేసినందుకు నాగశౌర్యకి అభినందనలు. ఒక పోలీసు ఇనస్పెక్టరు పాత్రని విలక్షణంగా, హృదయానికి హత్తుకునేలా ప్రదర్శించిన ప్రియదర్శికి హుర్రే! ఇక దియా అనే ఐదేళ్ల పసిపాప పాత్రని చిరస్మరణీయం చేసిన బేబీ వెరోనికా ఒక అద్భుతం.

ఈ చిత్రాన్ని చూసినవారు – గర్భస్రావం అనగానే ఉలిక్కిపడతారు. గొప్ప సందేశంతో, సమకాలీనులకు ప్రయోజనాత్మకమైన ఈ చిత్రం – హారర్ కోవకి ఓ గౌరవం.

గతంలో హిందీలో gauri – the unborn అనే చిత్రమొకటి ఇలాంటి కథాంశంతో హారర్ చిత్రంగా వచ్చినా – ఇది విభిన్నం.

ఈ చిత్రనిర్మాణానికి కారకులైనవారందరికీ అభినందనలు.

Leave a Reply

%d bloggers like this: