మే 22, 2018

ప్రజాస్వామ్య హంతకులు (జీ జీ వా జీ – 4)

Posted in కథాజాలం, జీర్ణం జీర్ణం వాతాపి జీర్ణం, ముఖాముఖీ at 11:50 ఉద. by వసుంధర

(అగస్త్య మహాముని – తన కడుపులో ఉన్న వాతాపి అనే మహారాక్షసుణ్ణి జీర్ణించుకుందుకు వాడిన మంత్రం ‘జీర్ణం జీర్ణం వాతాపి జీర్ణం’.  పిల్లలకు తిన్న పదార్థం సులభంగా అరగడానికి తల్లులు ఈ మంత్రాన్ని వాడడం ఆచారంగా వస్తోంది.  మన పురాణాల్లోని ఈ కథను క్రింద ఇస్తున్నాం. లంకె కోసం ఇక్కడ క్లిక్ చెయ్యండి.

ఇప్పుడీ కథ ఎందుకంటే – నేడు సాంఘికంగా జరిగే ఎన్నో విశేషాలు సామాన్య పౌరులకు జీర్ణించుకోవడం కష్టంగా ఉంది. ఆ విశేషాల్ని ఒకటొక్కటిగా చెప్పుకుని – ఈ మంత్రం పఠించదం మినహా ప్రస్తుతానికి మనం చెయ్యగలిగినదేమీ లేదు. 

ఈ శీర్షికకు తగిన విశేషాల్ని ఎవరైనా కథారూపంలో పంపవచ్చు. బాగున్నవి యథాతథంగానో, అవసరమనిపిస్తే ఆ మేరకు సరిచేసి కానీ అక్షరజాలంలో ప్రచురించగలం)

కర్ణాటక రాష్ట్రంలో ఎన్నికలొచ్చాయి. ముఖ్యమంత్రి సిద్ధరామయ్యది కాంగ్రెస్ పార్టీ. మాజీ భారత ప్రధాని దేవెగౌడది జనతాదళ్ సెక్యులర్ పార్టీ. ఒకప్పుడు అవినీతి ఆరోపణల నెదుర్కొని బయటపడ్డాననిపించుకున్న యెడ్యూరప్పది బిజేపీ. ఈ మూడు పార్టీలూ అధికారం కోసం తీవ్ర పోరాటం సాగించాయి. ఆ పోరాటంలో ప్రతి పార్టీ మిగతా రెండు పార్టీలనీ దుమ్మెత్తి పోశాయి.

ఫలితాలు వచ్చాయి. బీజేపీకి అందరికంటే ఎక్కువగా 104 సీట్లు వచ్చాయి. కాంగ్రెసుకి 78, జేడీ ఎస్‍కి 38. చెప్పాలంటే ప్రజలు మూడు పార్టీలనీ నిర్ద్వంద్వంగా తిరస్కరించారు.

ఫలితాలు చూస్తూనే అంతవరకూ పరస్పరం దుమ్మెత్తి పోసుకున్న కాంగ్రెస్, జేడీఎస్‍లు ఒక్కటయ్యాయి. కేవలం 38 సీట్లున్న జేడీఎస్ నేత కుమారస్వామిని ముఖ్యమంత్రిని చెయ్యడానికి కాంగ్రెస్ ఒప్పుకుంది. తనకి 116 సీట్లు ఉన్నాయి కాబట్టి ప్రభుత్వం ఏర్పాటుకి తననే పిలవాలని కుమారస్వామి గవర్నర్‍కి లేఖ వ్రాశాడు.

విడివిడిగా చూస్తే ఆ రెండు పార్టీలకంటే తమకే ఎక్కువ సీట్లు వచ్చాయి కాబట్టి ప్రభుత్వం ఏర్పాటుకి తననే పిలవాలని యెడ్యూరప్ప గవర్నర్‍కి లేఖ వ్రాశాడు. 

ఇటీవలే వివిధ గవర్నర్లు గోవా,  మణిపూర్, బీహార్ వగైరా రాష్ట్రాల్లో – ఎక్కువ సీట్లొచ్చిన పార్టీలని కాదని, ఎక్కువ సీట్లున్న కూటములకే ప్రాధాన్యమివ్వడం జరిగింది. కూటములు, గవర్నర్లు కూడా బీజేపికి అనుకూలంగా వ్యవహరించాయని కాంగ్రెస్ ఆక్రోశించిందప్పుడు.

ఇప్పుడు కర్ణాటకలోనూ గవర్నర్ బీజేపీకి అనుకూలం. ఆయన బీజేపీకి అనుకూలమైన సంప్రదాయాన్ని పాటించడం ఎంత చిత్రమో, అందుకు వ్యతిరేకంగా కాంగ్రెస్ ఆక్రోశించడమూ అంతే చిత్రం. కానీ యెడ్యూరప్పకు 104గురు సభ్యులతో సంఖ్యాబలాన్ని ఋజువు చెయ్యడం ఎలా?

కాంగ్రెసునీ, జేడీఎస్‍నీ ప్రజలు తిరస్కరించారనీ, ఎన్నికలముందు ఒకరిపై ఒకరు దారుణమైన ఆరోపణలు చేశారనీ – వారు కూటమిగా ఏర్పడ్డం అనైతికమనీ బీజేపీ అంటుంది. అంటూనే తమ ప్రత్యర్థి పక్షాలనుంచి కొందరు ఎమ్మెల్యేలను తమవైపు తిప్పుకోవడం అనైతికం అనుకోదు.

తమ కూటమికి సంఖ్యాబలముందని చెబుతూనే – ఏ క్షణాన వారు బీజేపీ వైపు మళ్లిపోతారేమోనని భయపడుతూ వాళ్లని రహస్యంగా దాచిపెడుతోంది కాంగ్రెస్ కూటమి.

ఓ పార్టీ తరఫున ప్రజలముందు నిలబడి ప్రతినిధిగా ఎన్నికైనా – మర్నాటికే అదే పార్టీలో కొనసాగుతారా అన్నఅనుమానానికి తావిచ్చే ఎమ్మెల్యేలు. వారి బలంతో ప్రభుత్వాన్ని ఏర్పాటు చెయ్యాలనుకునే పార్టీలు. 

సంఘటనలు తమకు ప్రతికూలంగా జరిగినప్పుడల్లా – ‘ప్రజాస్వామ్యం హత్యకు గురయింది’ అంటున్నారు నేతలు.

మనుషుల్నే కాదు – విలువల్నీ, సంప్రదాయాల్నీ కూడా హత్య చెయ్యడమే ప్రజాస్వామ్యానికి ప్రాతిపదికగా ఉన్నట్లు పౌరులు భావిస్తున్న ఈ తరుణంలో – ప్రజాస్వామ్యం హత్యకు గురయిందనడం – ఓ జబర్దస్త్ జోక్. 

ఏం చేస్తాం – జీర్ణం జీర్ణం వాతాపి జీర్ణం!

(ఇది ఈనాటి కథ కాదు. ఎమ్మెల్యేలని రహస్యంగా దాచడం అంశంగా 1988లో వసుంధర వ్రాసిన బానిస కథ చదవండి)

Leave a Reply

%d bloggers like this: