జనవరి 31, 2021
సద్గురు సాయి – ఒక అసామాన్య దృశ్యకావ్యం
ఈటివిలో కొంత కాలంగా సాయంత్రం 6-6.30 సద్గురు సాయి అనే డెయిలీ సీరియల్ వస్తోంది.
భక్తుల పాట్లు, దేవుడి లీలలు – ఇంతే కదా ఇలాంటి కథలు అనుకుంటూనే ఎందుకో ఆరంభంలో వరుసగా కొన్ని ఎపిసోడ్సు చూశాం. కథనం మేమనుకున్నదానికి విభిన్నంగానూ, అత్యంత ఆసక్తికరంగానూ ఉంది. సుమారు 60కి పైగా ఎపిసోడ్లు చూసేక, సమయం చిక్కక కొన్ని మిస్ కావాల్సి వచ్చింది. ఈటివి విన్ (etv win app) లో వెదికితే ఒకోసారి దొరికాయి, ఒకోసారి దొరకలేదు. అది హిందీ సీరియల్ కి అనువాదమని తెలుసు కాబట్టి గూగుల్ సెర్చి చేస్తే – సోనీ సిక్స్ అనే చానెల్లో కొన్నేళ్లక్రితం మేరే సాయి పేరిట సుమారు 700కి పైగా ఎపిసోడ్లు వచ్చినట్లు తెలిసింది. దాంతో హిందీకి మారిపోయాం. ఇంతవరకూ ఒక్కటి కూడా మిస్ కాకుండా 350 ఎపిసోడ్లు దాటాం. రోజుకి ఒకటికి మించే చూస్తూ, ఒకోసారి ఒక్కరోజులో ఏకబిగిని 10 ఎపిసోడ్లు చూడ్డం కూడా జరిగింది. అంత ఆసక్తికరంగానూ, రసవత్తరంగానూ నడుస్తోంది ఈ సీరియల్.
సమకాలీన సమాజాన్ని దృష్టిలో ఉంచుకుని – గత శతాబ్దపు తొలిభాగపు నేపథ్యంలో నడుస్తున్న ఈ సీరియల్లో స్పృశించిన అంశాలు – నేటి సామాజిక, రాజకీయ, ఆర్థిక, వినోద, నేర ప్రవృత్తులను విశ్లేషించిన తీరు అసామాన్యం, అద్భుతం, ప్రయోజనాత్మకం.
పాత తరానికి కనువిప్పు. నేటి తరానికి హెచ్చరిక. భావి తరానికి మార్గదర్శకం – అదీ ఈ సీరియల్!
ఇందులో భక్తికంటే మనస్తత్వ విశ్లేషణకూ, మహిమలకంటే తర్కానికీ ప్రాధాన్యముండడం విశేషం. అది నటీనటుల అసమాన ప్రతిభో, దర్శకుని అసాధారణ చాతుర్యమో – ఈ ఎపిసోడ్లలో కనిపించే నటీనటులు ఆయా పాత్రలకోసమే పుట్టారా అనిపిస్తుంది. నేడు వస్తున్న డెయిలీ సీరియల్సు నిర్వాహకులు నేర్చుకుని అనుకరించాల్సిన అంశాలు ఎన్నో ఉన్న ఈ సీరియల్ని హిందీలో చూడాలంటే మొదటి ఎపిసోడ్ కోసం ఇక్కడ క్లిక్ చెయ్యండి.
తెలుగులో చూడాలంటే ఇక్కడ క్లిక్ చెయ్యండి.
తెలుగులో సంభాషణలు సముచితంగా ఉన్నాయి. అయినప్పటికీ హిందీని అనుసరించగలిగినవారికి – ఆ అనుభూతి అదనం!
ఆగస్ట్ 3, 2020
విష్ణుశర్మ ఇంగ్లీషు చదువు
నాట్‍సాప్ బృందం సౌజన్యంతో ఒక గొప్ప లంకె కోసం ఇక్కడ క్లిక్ చెయ్యండి
ఎందరో మహానుభావులు….. విశ్వనాథ సత్యనారాయణ గారు, రచించిన విష్ణుశర్మ ఇంగిలీషు చదువు, మన మాతృభాష రమ్యతను, సుకుమారాన్ని ఇంకా మన చిన్నతనం లో ఇంగిలీషు భాషను ఎలా బట్టీ పట్టామో గుర్తుకొస్తుంది.
ఈ ఆదివారం మంచి అద్భుతమైన కాలక్షేపం.
జూన్ 30, 2020
పాతాళ్ లోక్ – అమెజాన్ వెబ్ సిరీస్
కుళ్లు కంపు కొడుతున్న కులవ్యవస్థ, చట్టాలకు లొంగని నేరప్రపంచం, ఉచ్ఛనీచాలు పట్టించుకోని రాజకీయరంగం, అబద్ధాల ప్రచారమే బ్రతుకుతెరువుగా మీడియా, పదవిలో ఉన్నవారికి సహకరించడానికే తామున్నది అన్నట్లు వ్యవహరించే పోలీసు సంస్థ – ఇవీ పాతాళ్ లోక్ అనే 9 భాగాల వెబ్ సిరీస్‍కి ప్రేరణగా ఉన్న అంశాలు.
నటీనటులు ఆ పాత్రలకోసమే పుట్టారా అన్నట్లున్నారు. చిత్రీకరణ – ఆయా సన్నివేశాల్ని సిసిటివి కెమేరాల్లో చూపుతున్నారా అన్నంత సహజంగా ఉంది. ఒకొక్కటి 40-50 నిముషాలు ఉండే ఈ సిరీస్ – మొత్తం 9 భాగాల్నీ ఒక్కసారి చూసేయాలనిపించేటంత ఆసక్తికరంగా ఉంది.
దేశంలో ఇలాంటి అంశాల్ని ఇంత బాగా ప్రదర్శించగలవారున్నారా అనిపించే ప్రతిభ, తీస్తే ఇలాగే తియ్యాలనిపించేటంత సామర్థ్యం – ఉన్నప్పటికీ – ఇందులో మింగుడు పడనివి కొన్ని ఉన్నాయి.
భరించలేనంత కుళ్లు కంపు కొట్టేలా అత్యాచారాన్నీ, వెగటు పుట్టించేటంత అసహ్యంగా స్త్రీపురుషులమధ్య అక్రమ సంబంధాల్నీ – చిత్రీకరించడం ఈ వెబ్ సీరీస్‍ మొత్తానికి కేవలం పది పన్నెండు నిముషాలు దాటకపోయినా – అది అనవసరంగా అంటించుకున్న మచ్చ అనిపిస్తుంది. ఆ ఒక్క కారణంగా ఇంత మంచి సిరీసుని కుటుంబసమేతంగా చూడ్డం ఇబ్బంది ఔతుంది.
అలాంటి సన్నివేశాల్ని సభ్యసమాజానికి ఎలా చూపాలో తెలుసుకుందుకు శంకరాభరణం చిత్రంలో – 39 నిముషాల తర్వాత వచ్చే 2-3 నిముషాల దృశ్యం చాలు.
సహజత్వం కోసం – భాషా సంస్కారాన్ని పూర్తిగా మర్చిపోవడం ఈ సిరీసులో మరో ఇబ్బంది. హిందీలో ఉన్న ఈ వెబ్ సిరీసుకు – వ్రాతల్లో మాటలు – తెలుగులో కూడా ఉండడంవల్ల – కథ చక్కగా అర్థమౌతుంది. ఐతే హిందీ పదాలకి అచ్చ తెలుగు పచ్చిబూతుల్ని – తెరపై అక్షరాలుగా చదవడం – అదో భయంకర అనుభవం. సకుటుంబంగా ఈ సిరీస్ చూడ్డానికి ఆ భాష కూడా పెద్ద ఇబ్బంది.
బుల్లితెర కోసం చిత్రాలు నిర్మించేవాళ్లు – పై విషయాల్లో జాగ్రత్త పడితే – ఇలాంటి అద్భుతమైన సిరీస్ విశేషాల్ని పదిమందితో పంచుకోగలుగుతాం.
ఏదిఏమైనా పాతాళ లోక్ వెబ్ సిరీస్‍లో 96% అద్భుత సృజనాత్మకతకు అభినందనలు.
ఫిబ్రవరి 7, 2020
జీవనసాఫల్య పురస్కారం – ఆచార్య ఎన్. గోపి
కలకత్తాలోని ప్రతిష్టాత్మక సంస్థ భారతీయ భాషా పరిషత్ ప్రముఖ తెలుగు కవి డా. గోపికి జీవన సాఫల్య పురస్కారాన్ని (కర్తృత్వ సమగ్ర సమ్మాన్) ప్రకటించింది. భాషా పరిషత్ భారతీయ భాషల సాహిత్య వికాసం కోసం 1975లో బెంగాల్ రాష్ట్రంలో ఏర్పడిన సంస్థ. ఇది భారతదేశ బహుళ వాద సంస్కృతిని, దేశ అఖండతనూ సృజనాత్మకతనూ ప్రోత్సహిస్తున్న క్రియాశీలక సంస్థ.
2019 సంవత్సరానికిగాను ఈ పురస్కారాన్ని ఒక తెలుగు కవికి ప్రకటించారు. డా. ఎన్. గోపి రచించిన “కాలాన్ని నిద్రపోనివ్వను, జలగీతం, నానీలు, వృద్ధోపనిషత్” తదితర గ్రంథాలు హిందీతో పాటు పలు జాతీయ, అంతర్జాతీయ భాషల్లోకి అనువాదమైనాయి.
ఈ పురస్కారానికి గాను లక్ష రూపాయల నగదు, సన్మాన పత్రం, అంగవస్త్రం ప్రదానం చేస్తారు. ఈ మేరకు మార్చి 21, 2020న కలకత్తాలోని పరిషత్ సభాగారంలో జరిగే ప్రత్యేక సమావేశంలో (అలంకరణ సమారోహ్) పురస్కార ప్రదానం జరుగుతుందని భారతీయ భాషా పరిషత్ అధ్యక్షులు డా. కుసుమ్ ఖేమాని తెలిపారు.
(పరిషత్ ఉత్తరం జతచేయడమైనది)
