ఏప్రిల్ 13, 2021
ఉగాది శుభాకాంక్షలు
ప్రభుత్వంలో ఉన్నా ప్రతిపక్షంలో ఉన్నా ప్రజలెన్నుకున్న నాయకులందరూ ప్రజాప్రతినిధులు. వారు పరస్పరం నిందించుకుంటే, వారినెన్నుకున్న ప్రజల్ని అవమానించడమే!
ప్రస్తుతం వరగర్వితులైన రాక్షసుల్ని మరిపిస్తున్న కరోనా మహమ్మారిని ఎదుర్కోవాలంటే- ముందు మనలోని రాక్షసాంశ స్థానంలో దైవత్వాన్ని నింపాలి కదా!
ప్రత్యర్థుల నామస్మరణే ధ్యేయంగా పెట్టుకున్న హిరణ్యకశిపుడు, కంసుడు, దుర్యోధనుడు మనకి ఆదర్శం కాకూడదు.
కొత్త సంవత్సరంలో ప్రజానాయకులందరూ, ప్రత్యర్థిని కాక ప్రజాసేవనే స్మరిస్తూ, దేశాన్ని ముందుకు తీసుకెడతారని ఆశిద్దాం.
అందరికీ ప్లవ నామ సంవత్సర ఉగాది శుభాకాంక్షలు
జనవరి 1, 2021
శుభాకాంక్షలు 2021
అల్లకల్లోలం 2020
అదృష్టం తను నిన్నే వెళ్లిపోయింది
అధఃపాతాళమే ఇక తనకి
అందరిదీ ఇప్పుడదే కోరిక!
అద్భుతాల నిలయం 2021
అనుకుందాం తను నేడే వచ్చింది
ఆకాశమే హద్దని మనకిక ఆశ
అందరికీ అభీష్ట సిద్ధిరస్తు!
నూతన సంవత్సర శుభాకాంక్షలు!
అక్టోబర్ 13, 2020
ముందు – వెనుక
ఎవరో కానీ చక్కగా రాసారు, పూర్తిగా చదవండి:
నేత: అవును ఇప్పుడు మంచి సమయం వచ్చింది
ప్రజలు: మీరు ఇప్పుడు దేశాన్ని దోచేస్తారా
నేత: లేదు
ప్రజలు: మీరు మాకోసం పని చేస్తారా
నేత: అవును, ఖచ్చితంగా
ప్రజలు: మీరు నిత్యావసర వస్తువుల ధరలు పెంచుతారా
నేత: దానిగురించి ఆలోచించకండి
ప్రజలు: మీరు మాకు ఉద్యోగాలు, జీవనావసరాలు ఇస్తారా
నేత: ఖచ్చితంగా
ప్రజలు: మీరు దోపిడీ, అక్రమాలు చేస్తారా
నేత: మీకు పిచ్చా, లేదు
ప్రజలు: మేము మీ మీద నమ్మకం పెట్టుకోవచ్చా
నేత: హా
ప్రజలు: ఓహ్ మా నేత
నేత ఎన్నికల్లో గెలిచాడు, గెలిచి వచ్చాడు
ఇప్పుడు కిందనుండి పైకి చదవండి
మార్చి 28, 2020
దేవుళ్లు
కరోనా వీరవిహారం చేస్తుంటే
తలుపులు మూసుకుని ఇళ్లలో దాక్కున్నాం
ఐనా ఏమాత్రం లోటు లేకుండా
పీల్చుకుందుకు గాలి దొరుకుతోంది
అందుకే దేవుడికో నమస్కారం
ఇంకా
కుళాయిలో నీళ్లొస్తున్నాయి
దీపాలు వెలుగుతున్నాయి ఫాన్లు తిరుగుతున్నాయి
వీధులు శుభ్రపడుతున్నాయి
పప్పూ ఉప్పూ కూరా నారా మందూ మాకూ
వగైరా వగైరాలకు దుకాణాలూ, వైద్యుల ఇళ్లూ తెరిచున్నాయి
అందుకే ఆ దేవుళ్లందరికీ కోటి నమస్కారాలు
